Membuat karangan bahasa daerah tolaki.hanya 5 paragraf saja

La’ito o’aso otembo anolako i Wesande me’onaha anotekoni moko’uono. Lako’ito lumolambua meopolaha iwoi, mano tano onggiki hae itomo iwoi. Ieto bara sinuano iwoi la inetawa toho. Mahio’ito nomoko’uono to’oto notehanungge noiwoi ine tawa ano ale uminu’i.
         Ietoka bara ona nggiro’o ano mendia i Wesande. Te’embe hae tano langgi wawo rapu. Ropendutulu’ito ona tono dadio nomosa’ato gau-gauno, pinokomendia. Mano lala’ieto i Wesande nopehapu, ki’oki no’ari medulu’ako langgai, ano tekoni mendia, ieika no’ari mo’inu iwoi ine tawa ndoho, laha’ano lako me’onaha, mano tanionggi parasaea’i.
            Lakonoto i Wesande meotonao, te’eni, “ako ambato ari medulu’ako langgai akumendia, ma, kekupe’ana ma nggo ieto wawo’aku, akutomate sumurundia. Ie keno ta ieki, ma, akuki melai ndoro, kekila barakano ananggu matu oleo peromboi.”
Mano mbako i Wesande meotonao tano pinarasea. Pinotuha’ito ari laikano peohaino lako pinelaika’ako i ahoma anopo’ia dowo sambe ano pe’ana dowo. Sina ropembodea’i Wesande nope’anato ronga salama’ika iepo ona aro la iha-iha mbebarasaea’i notano pinoko-mendiaki. 
            Elengua’iropo mbebarasaea’i notudu ona ari lahuene bangga-bangga la lako umula’i mbera parewa mbesosambakaino anano i Wesande. Ieto la lako wawe’i nggiro’o obangga no’amano anano i Wesande, ari i wawo sangia.
           Ieto la lako niawono nopetuha amano, watu mbeosambakai, pingga mbebahoano anano. Ari’ipo ona anano i Wesande sinosambakai iepo ona amano nopondamoke tamono anano ieto bara i Pasa’eno.           

Mbesobairoto ona tono dadio ako ine amano i Pasa’eno nosangia toude, ronga lako kei Pasa’eno no’ana sangia. Sambe ingoni oleo laha’iroika nggiro’oro parewa mbesosambaino i Pasa’eno. I Pasa’enoto ona ni’ino mbepuearo mbera tono tinamoako tano anakia, tano o’ata.